އެ ދުވަހު ކޮންމެ ގެޔަކުން ވެސް އިންތިޒާރު ކުރަމުން އައީ އޭނާ އެ ހިސާބުގަނޑަށް އަންނާނެ ވަގުތަކަށެވެ. އީދުގެ އުފަލުގައި ރޭޑިއަންޓް ކްލަބުން އިންތިޒާމު ކޮށްގެން މާލޭގެ އެކި ހިސާބުތަކުގައި ބާއްވަމުން ދިޔަ ކުޅިވަރުތަކުގައި ލަވަކިޔުންތެރިންނާއި ނެށުންތެރިންނާއި ކޮމީޑިއަނުންގެ ގިނަ ހަރަކާތްތަކެއް އޮތް ނަމަވެސް އެންމެންގެ ޝައުގުވެރިކަން ގުޅިފައި އޮތީ އެ ގްރޫޕުގައި ހިމެނޭ ޒުވާން އެ އަންހެން ލަވަކިޔުންތެރިޔާއާ އެވެ. އަސުރަށް ފަހު އެ ގްރޫޕް ދާން އޮތް މައްޗަންގޮޅީ ބޯޅަކިންކިރިމާގޭގައި އޭރު އޮތީ ހުރިހާ ކަމެއް ތައްޔާރު ކޮށްފަ އެވެ. ކަރަންޓު އަޅައި، މިއުޒިކް ސާމާނުތައް ހުރީ އަތުރައިފަ އެވެ.
އެންމެ ފަހުން އިންތިޒާރު ކުރަމުން އައި ވަގުތު ޖެހިއްޖެ އެވެ. މެންދުރުއްސުރެ އެ ގޭގެ ދޮށަށް ޖަމާވެފައި ތިބި އެތައް ބަޔެއްގެ ރޫހު އާވެލީ އެ ލަވަކިޔުންތެރިޔާ މައިކު އަތަށް ހެޔޮވަރުކޮށްލައި، ފުރަތަމަ ހުށަހެޅުމަށް ތައްޔާރުވެލުމުންނެވެ. އަދި އެމްޕްލިފަޔަރަށް ކަރަންޓު ދިނުމާ އެކު މައިކު ޓެސްޓުކުރުމަށް އޭނާ އޭގައި ދެ ތިން ފަހަރު ޖަހާލި އެވެ.
0 Comments